உதயசங்கர் இன்றைய தூத்துக்குடி மாவட்டத்திலுள்ள கோவில்பட்டியில் பெப்ருவரி 10, 1960 அன்று கமலம் - ச. கார்மேகம் இணையருக்குப் பிறந்தார். கோயில்பட்டி ஏ.வி.உயர்நிலைப்பள்ளியில் பள்ளிக்கல்வி பயின்றார். கோயில்பட்டி ஜி.வேங்கடசாமி நாயுடு கல்லூரியில் வேதியியலில் இளங்கலைப் பட்டம்பெற்றார். 

​

உதயசங்கரின் மனைவி பெயர் மல்லிகா. நவீனா, துர்கா என்று இரு மகள்கள். இந்திய ரயில்வே துறையில் நிலையத் தலைவராகப் (station master) பணிபுரிந்து ஓய்வுபெற்றார்.

​

உதயசங்கர் இந்திய கம்யூனிஸ்டுக் கட்சி (மார்க்ஸிஸ்ட்) தொழிற்சங்கத்திலும், அதன் இலக்கிய அமைப்பான தமிழ்நாடு முற்போக்கு எழுத்தாளர் சங்கத்திலும் இணைந்து பணியாற்றினார். 

​

உதயசங்கர் 1978 முதல் கவிதைகள் கவிதைகள் எழுதத் தொடங்கினார். நாறும்பூநாதன் நடத்திய மொட்டுகள் என்னும் கையெழுத்துப் பத்திரிகையில் முதல் கதை வெளிவந்தது. கோயில்பட்டியின் இலக்கியச் சூழலுக்கு அதன்பின் அறிமுகமானார்.

​

உதயசங்கர் எழுதிய முதல் சிறுகதை மார்ச்,1980 -ல் செம்மலர் இலக்கிய இதழில் பிரசுரமானது. முதல் சிறுகதை நூல் ’யாவர் வீட்டிலும்’

1988 -ல் வெளியானது

​

உதயசங்கர் 1986 -ஆம் ஆண்டு வேளானந்தல் எனும் ஊரில் ரயில்வே ஊழியராக இருக்கையில் மலையாளம் கற்றுக்கொண்டார். 1995 முதல் மலையாளத்தில் இருந்து மொழியாக்கங்கள் செய்யத் தொடங்கினார். வைக்கம் முகமது பஷீர் எழுதிய 'சப்தங்கள்' உள்ளிட்ட நூல்களை மொழியாக்கம் செய்துள்ளார். ஏராளமான சிறார் இலக்கிய நூல்களையும், இடதுசாரிக் கொள்கைகளை முன்வைக்கும் கட்டுரை நூல்களையும் மொழியாக்கம் செய்துள்ளார்.

​

உதயசங்கரின் நூல்களில் எண்ணிக்கையில் சிறார் இலக்கியப் படைப்புகளே மிகுதி. சிறார் இலக்கிய மொழியாக்கங்களும் செய்துள்ளார். 

 

​